BAGUIO CITY–Inyunay-unay ni La Trinidad Mayor Romeo Salda dagiti baru a pagalagadan dagitoy seknan iti panagbiahe dagiti umili kalpasan ti taripnong ti nagduduma nga dadaulo ti Benguet.
Iti interview ti Bombo Radyo kenkuana, pinalagipanna dagiti panggepda a sumrek iti masakopanda kasta metten dagiti residente iti agtultuloy a panagtulnogda kadagiti protocols.
Sigun kenkuana, napagnumuanda a saanen a kasapulan ti panakaikalikagum iti RT-PCR test ken ti Travel Authority no agturong kadagiti munisipyo iti probinsia ti Benguet kas maitunos iti uniform travel protocols nga impaulog ti IATF.
Nupay kasta, nasken met nga agrehistro iti www.latrinidad.gov.ph dagiti agbiahe nga agtaud iti nagduduma nga probinsia.
Nasken met nga dumalan iti triage dagiti Locally Stranded Individuals (LSIs) ken returning overseas Filipinos (ROFs) iti quarantine facility sadiay Wangal La trinidad.
Malaksid iti dayta, saan met nga maikalikagum ti Health declaration form kabayatan ti panagturong iti inter-municipality ti Benguet ngem nainget latta ti panagwanawan kadagiti checkpoints tapnu masigurado nga masukimat dagiti indibidual nga addaan iti sintomas.
