BAGUIO CITY – Naiyuswat ditoy siudad ti Baguio ti Transport Pre-Alert & Support System wenno T-PASS a maysa a platform para iti online a panagmonitor ken surveillance ti garaw dagiti trucking, hauling ken logistics businesses.
Sigun kenni City Mayor Benjamin Magalong, ti T-PASS ket transport system a mangsalwad kadagiti kargamento babaen iti panangmonitor iti garaw dagitoy malaksid a mapalaka ti panakaibiahe dagitoy manipud iti nagtaudanda ken iti pakaituronganda.
Namnamaenna a mapasayaat ti sistema dagiti agdama a pagalagadan iti border control system ti siudad ken mapapintas pay daytoy ti containment system ti Baguio.
Manamnama pay a makatulong ti sistema iti panakaprebentar ti panagwaras ti COVID-19.
Sigun met kenni Edgardo Cayton, presidente ken CEO ti Dynamic Outsource Solutions, Inc. (DOS-1) a service provider ti T-PASS, ti Baguio ti kaunaan ken modelo iti panaka-aramat ti nasao a teknolohiya iti entero a pagilian.
Naituding met a maisayangkat ti orientation seknan iti nasao a sistema kadagiti trucking, hauling ken dadduma pay a logistics companies iti lokalidad.
Agar-aramat ti T-PASS iti digital registration ken checkpoint system no sadino, umuna iti proseso ti panagirehistro dagiti kompanya wenno forwarder iti cargo vehicle wenno lugan dagitoy bayat nga iberipikar ti lokal a gobyerno ken maseknan nga ahensia ti gobyerno ti listaan dagiti nasao al lugan ken dagiti requirements nga insumitir dagitoy.
Apaman a mairehistro ti cargo vehicle iti T-PASS ket nasken nga ipaayan ti forwarder iti pre-alert information ti receiver iti agarup 24 hours sakbay ti panakaibiahe dagiti kargamento.
Kalpasanna ket maimprenta ti mapataud a QR Code ken daytoy ti ma-scan kadagiti border checkpoints kabayatan ti panakaibiahe dagiti kargamento.
