BAGUIO CITY – Sumangsango iti nagtutuon a kaso, partikular ti acts of lasciviousness ken motornapping ti maysa a 20-anyos a lalaki gapu iti maatap a panangbastosna iti dua a babbai ken iti panagtakawna ti motorsiklo sadiay Bangued, Abra idi parbangon kalman.
Sigun iti pulisya, nagsaruno a nagreklamo ti dua a babbai nga agpada a 34-anyos kalpasan ti panangbastos kadakuada ti suspek a nabigbig a ni Aldrin Fabroa, residente ti Danglas, Abra.
Sigun iti maysa kadagiti biktima, magmagnada iti kadwana iti paset ti Zone 5, Bangued idi killaat nga ingeman ti naka-motorsiklo a suspek ti ubetna.
Sigun met iti maysa, nakamotorsiklo daytoy idi inguyod daytoy ti suspek ken sadiay nga ingeman ti suspek ti barukongna.
Nakemmeg met ti suspek a naamuan a nabartek iti naisayangkat a hot pursuit operation.
Inkalintegan met ni Fabroa a ti ammona ket ka-batch-na dagiti biktima isut gapuna a naaramidna ti nasao a banag.
Naamuan met a bayat ti kaadda ni Fabroa iti uneg ti istasyon ti pulisya ket naduktalan a tinakawna ken ti simmuko a kadwana ti maysa a motorsiklo.
