BAGUIO CITY – Pimmusay ti maysa a baro kalpasan a naaksidente ti motorsiklona sadiay Sitio 16, Bobok-Bisal, Bokod, Benguet idi pangaldaw ti Dominggo, September 1.
Nabigbig daytoy a ni Wagner Podos Melly, 29-anyos, tubo ken residente ti Pakso, Kabayan, Benguet.
Nagresponde dagiti pulis kalpasan a nakaawatda iti awag seknan iti maysa a motorcycle accident.
Dagusda a nagresponde ken ditoy a nadanunanda ti biktima a nakaidda iti daga iti abay ti maysa a motorsiklo.
Inaplikaran ti medics team iti CPR ti biktima sakbayda nga inturong iti pagagasan.
Nupay kasta, naideklara a dead on arrival ti biktima iti Dennis Molintas District
Hospital.
Mapapati a natnag ti biktima ken ti motorsiklo iti rangkis nga addaan kauneg nga agarup nasurok pito a metro.
Malamlamayan metten ti bangkay ti biktima iti pagtaengan dagitoy. (-with Bombo Brigitte Marcasi)
