Inlawlawag dagiti opisyales ti Blessed Association of Retired Person wenno (BARP) Foundation Inc. nu apay a nabayag ti panangipaayda ti benepisyo dagiti pimmusay a miyembro dagitoy.
Iti interview ti Bombo Radyo, kinuna ni Rogelio Urbanozo, Acting Chief Executive Officer ti BARP Foundation Inc., ti opisinada ket mutual assistance program nu sadino dagiti maurnong a kontribusyon ket isu metlaeng ti ipaayda kas benepisyo wenno bayad kadagiti pumusay a miyembro.
Impeksana a naapektaran dagitoy idi pandemya gapu ta sumagmamano kadagiti miyembroda ti saan a nagbayad ti kontribusyonda rason nga awan met ti naurnong a koleksyonda.
Impetteng ni Urbanozo nga idi saan a nagpandemya ket awan ti dakkel a parikut ti Blessed Association of Retired Person wenno (BARP) Foundation Inc. gapu ta tallo agingga uppat laeng a bulan ti pannakaitantan ti panangipaayda ti benepisyo.
Manipud iti 6,750 nga aktibo a miyembro, dinakamat ti opisyal a mapatta-patta a 4,900 laeng a miyembro ti nagbaybayad.
Sigun pay kenni Urbanozo, ti benepisyo a maala dagiti miyembro ket nakadepende iti kabayag dagitoy a nagbaybayad ti kontribusyon.
Innayon ti nasao nga opisyal a kinnisayanda ti standard factor gapu ta narigat ti pundasyon iti panagbayad dagiti miyembro rason a bimmaba met ti koleksyonda.
Gapu iti daytoy, ilakoda ti pasdekda tapno mabayadan dagiti 480 a miyembro a saan pay a nakaawat ti benepisyoda.
Impasigurado met dagiti maseknan nga opisyales a manamnama a mabayadan iti las-ud ti innem a bulan dagiti utangda kadagiti miyembro apaman a mailako ti pasdekda.
Kagiddan iti daytoy, kidkiddawen ni Urbanozo kadagiti miyembro a bayadanda ti kontribusyonda ken impanamnamana pay a nakasagana dagitoy nga agpalawag kadagiti miyembro ken kadagiti kayatna pay nga agpamiyembro.//MarielleApat
