Agtultuloy a pakaseknan dagiti otoridad dagiti basura a maibelbelleng iti City Camp Lagoon sadiay Lower Rock Quarry, Baguio City.
Iti pannakiuman ti Bombo Radyo kenni Silvino Cominga Jr., Barangay Kapitan ti Lower Rock Quarry, Baguio City, kinunana a saan latta a maliklikan nga adu dagiti agibelbelleng iti basurada kadagiti kanal rason a maiyan-anod daytoy iti City Camp Lagoon.
Iti baet dayta, kinunana a dakkel a tulong dagiti naimuntar nga screen sadiay a mangsagat kadagiti basura paturong iti siltation dam.
Malaksid iti dayta, nakissayan metlaengen dagiti basura a maibelbelleng sadiay no idilig idi napalpalabas a tawen.
Impettengna pay a kanayon ti panagmonitor dagitoy iti nasao a siltation dam nangruna ita a panagtutudo rason a no adda dagiti maurnong a basura ket dagus a maikkat daytoy.
Kagiddan iti dayta, agkidkiddaw daytoy iti tulong ken kooperasyon dagiti umili a liklikan ti panangibelleng iti basura kadagiti kanal kasta metten ti umno a panangi-segregate iti basura.
