Impakita agarup 500 a residente idiay Camp 3, South Dap-ay, Acupan, Virac, Itogon ti bayanihan kalpasan a nagtitinulongda nga ilisi dagiti batbato a natnag manipud idiay Ampucao, Itogon.
Iti panakiuman ti Bombo Radyo kenni Jim Brown Adangla, residente ti nasao a lugar, kinunana a nangrugi dagitoy a nagdalus idi pasado alas sais ti agsapa ngem naitantan ti daytoy gapu iti panagbayakabak ti tudo.
Sigun kenni Adangla, ti panagreggaay idiay Ampucao ket intunda dagiti bagyo a Marce ken Nika.
Mabalbalakadan met dagiti umili sadiay nga agbakwit dagitoy tapnu maipasigurado ti seguridadda nangruna ket mapaspasaran latta ti saan a nasayaat a panawen.
Kabayatanna, imbinglay ni Rosemarie Cho-oy, residente met laeng ti nasao a lugar, a saan a natalged ti eskwelaan a naituding nga evacuation center gapu ta asideg daytoy iti karayan.
Gapu iti dayta, naballaagan dagiti residente nga agbakwitda kadagiti kabagyanda nga agnanaed iti kabangibang a barangay wenno iti siudad ti Baguio.
Impeksa met dagiti residente ti panagyamanda kadagiti opisyales ken nagduduma nga ahensya ken awtoridad gapu iti agtultuloy a monitoring dagitoy para iti panakaisigurado ti kinatalged ti tunggal maysa.
