![](https://img.bomboradyo.com/baguio/2021/09/LICOBEN-VS-RAFAEL-1.jpg)
BAGUIO CITY – Nakasagana a sumango iti korte ti kampo ni Atty. Ana Marie Banaag Rafael, ti dinutukan ti National Electrification Administration – Board of Administrators (NEA-BOA) kas General Manager ti Benguet Electric Cooperative (BENECO) iti kanito a mangipila ti kaso ti kampo ni Engr. Melchor Licoben, ti dinutukan met ti Board of Directors ti BENECO a General Manager ti kooperatiba.
Iti interview ti Bombo Radyo Baguio kenni Atty. Willy Managtag, Legal Council ni Atty. Rafael, kinunana a nawaya ti kampo ni Engr. Licoben a mangipila ti kaso ken sidadaanda a sumango iti daytoy.
Kinunana a rumbeng laeng a maidalan ti isyu iti desisyon ti korte manipod pay idi umuna nga aldaw iti panakaiyawat kadakuada ti resolusyon manipod iti NEA-BOA para iti panakaipatugaw ni Atty. Rafael kas General Manager ti BENECO.
Innayonna a saan a dagitoy iti umuna nga agturung iti korte gapu ta awan ti rason nga agturungda sadiay nangruna ta ni Atty. Rafael ti addaan ti otoridad a mangidaulo ti kooperatiba gaputa addaan daytoy ti umno nga appointment iti posisyon.
Dinakamatna a contempt of court laeng iti maala a sungbat ti kampo ni Engr. Licoben iti kanito nga agturung dagitoy iti korte gapu ta amin a desisyon ti Board of Directors ket magna iti NEA.
Impettengna met nga umno laeng ti panangisumitir dagiti uppat a miembro ti Board of Directors ti kooperatiba iti Performance Management Contract (PMC) para kenni Atty. Rafael iti opisina ti NEA.
Malaksid iti dayta, naawaten ti NEA ti naisubmitir a PMC ken ur-urayenda laengen ti sungbat ti nasao nga opisina iti daytoy.
Innayon pay ni Atty. Managtag a sumango iti kaso ti kampo ni Engr. Licoben partikular ti administrative cases nangruna kadagiti saan a sumurot kadagiti pammilin ni Atty. Rafael.
Nupay kasta, iti kaudian nga advisory ni Engr. Licoben, impettengna a daytoy latta ti General Manager ti BENECO.
![](https://img.bomboradyo.com/baguio/2021/09/BENECO-ADVISORY-ENGR.-LICOBEN.jpg)
Dinakamatna ditoy ti panangaprobar ti kaaduan kadagiti Board of Directors ti BENECO iti Resolution No. 2021-151 a mangipetpetteng iti panakadutokna kas General Manager.
Inyulitna a nagkaykaysa dagiti Board of Directors ti BENECO a nangdutuk kenkuana kas General Manager ti kooperatiba idi April 2020 ken pinirmaanna pay ti PMC.
Al-allukuyenna met ti publiko nga amin a komunikasyon a para iti BENECO ket maidalan iti opisinana kas General Manager.
Impasigurado pay ni Engr. Licoben a business as usual ti BENECO ken maituloy ti panakaipaay ti 24/7 a serbisyo kadagiti member-consumer owners ti kooperatiba.