Impalagip ti Bureau of Immigration idi kalman kadagiti ganggannaet a nagtrabaho ti Philippine Offshore Gaming Operators (POGOs) nga awanen ti pannakapaatiddog ti Disiembre 31 a deadline para iti panagruarda iti pagilian.
Daytoy ket kasaruno ti pammilin ni President Ferdinand Marcos Jr. a maiserra amin nga operasion ti Philippine Offshore Gaming Operators iti pagilian iti ngudo ti agdama a tawen.
Sigun iti pannakangiwat ti Bureau of Immigration a ni Dana Sandoval, manipod iti 33,000 foreign POGO workers, agarup 21,000 ti naka-downgrade iti visada iti Pilipinas, a ti kaaduan a bilang ket pumanawdan iti pagilian.
Kinuna ti opisial a ti agpada a wagas ket maiyaplikar kadagiti foreign workers a planoda ti agsubli iti Pilipinas iti masakbayan.
Maipalagip nga idi Hulio, imbilin ni President Marcos Jr., iti gobierno nga ipaserrana ti operasion ti POGO iti Pilipinas kalpasan a naduktalan iti imbestigasion ti kongreso a ti massive offshore gambling industry iti Pilipinas ket mainaig kadagiti krimen a pakairamanan ti torture ken money laundering.
Sumagmamano kadagiti senador ti nangisingasing ti pannakaipasa ti Anti-POGO Act, a pakairamanan ti probision nga amin nga asset ti POGO ket mabalin a ma-forfeit a pabor iti gobierno.
