BAGUIO CITY – Manarimaan ti panakaipatungpal ti Commission on Elections – Baguio iti kaunaan a register anywhere program iti siudad.
Iti interview ti Bombo Radyo kenni Atty. John Paul Martin, Commission on Elections Officer, impakaamona nga adu dagiti agrerehistro iti agdama.
Kinuna pay ni Atty. Martin a manamnama a maiyusuat ti special registration idiay Malcom Square inton Enero bente tres wenno inton Biyernes nu sadino maipangpangruna dagiti Senior High School partikular dagiti nagtaud kadagiti nagduduma a lugar iti siudad ken probinsiya ti Benguet.
Malaksid iti dayta, mabalin met nga agparehistro dagitoy kadagiti bukodda a pagadalan nu sadino ipakitada laeng ti school ID-da a mangpaneknek a naka-enrollda iti nasao a pagadalan.
Para met kadagiti awanan ti school ID, mabalin met nga aramatenda ti National ID card ken birth certificate tapno makarehistro.
Dinakamatna pay a mabalin nga agparehistro dagitoy iti Philippine Statistics Authority nu sadino maipaayanda ti temporaryo nga identification card nga isu met ti aramatenda nga agparehistro iti COMELEC.
Agtultuloy met ti panangguyugoy dagitoy kadagiti agtutubo nga agparehistro dagitoy.//Marielle Apat
