BAGUIO CITY – Naksayanen ti atiddog a pila dagiti lugan a sumrek ditoy Baguio City kadagiti maisaysayangkat a quarantine checkpoint a paset ti Enhanced Community Quarantine.
Iti panakiyuman ti Bombo Radyo Baguio, kinuna ni PMaj. Oliver Panabang, dadaulo ti Traffic Enforcement Unit ti Baguio City Police Office nga iti maikapat nga aldaw nga implementasyon ti quarantine ket naobserbaranda a ‘light to moderate’ ti kadagsen ti trapiko kadagiti major checkpoints a pastrek ditoy siudad.
Dinakamatna a dagiti kangrunaan a checkpoint a pastrek ditoy siudad ket iti Marcos Highway, Naguilian Road, iti City Limit ti Baguio ken La Trinidad, Benguet sadiay Lower Magsaysay ken iti View Deck iti Kennon Road.
Imbingayna nga adu dagiti pinasublida a saan a taga-Baguio ngem kayatda ti sumrek iti siudad nga awanan met iti napateg a gagara.
Inaklon pay ni Maj. Panabang a pagparparikutanda ita dagiti checkpoints iti uneg ti siudad gaputa ditoy ti ayan dagiti adu a nasukir.
Nupay kasta, namnamaenna nga iti panaglabas dagiti aldaw ket maksayanen ti bilang dagiti tattao nga adda iti ruar ti babbalay dagitoy nga awanan met iti umno a rason.
Dinakamatna metlaeng a kadagiti sumarsaruno nga aldaw ket implementardan dagiti naing-inget a pagalagadan tapnu matungpal ti puntirya nga amin a tattao nga awanan ti napateg a gandat iti ruar ti babbalayda ket saandan a rumwar pay.
