BAGUIO CITY – Manaynayon ti bilang dagiti kameng ti NPA a sumuksuko iti gobierno sadiay Benguet.
Kasaruno daytoy ti isusuko ti maysa a kanayonan a kameng ti NPA sadiay Bangao, Buguias, Benguet itay laeng nabiit.
Naisuko metlaeng ti caliber 9mm a paltog nga addaan ti magazine ken bala.
Ti simmuko nga indibidual ket beterano a fighter iti tallo a tawen iti sidong ti Kilusang Larangang Guerilya Ampis nga addaan ti operasyon iti kabambantayan ti Benguet, Ilocos Sur, ken Mountain Province.
Sigun kenkuana, nairecruit daytoy ni alyas “Ka Simon”, ti Deputy Secretary-General ti AGHAM Youth iti Polytechnic University of the Philippines a napapatay idi October 30, 20221 kabayatan ti panakirinnupakda iti tropa ti gobierno sadiay Gueday, Besao, Mountain Province.
Kinunana a naamirisna a biddot ken saan a nalinteg ti ideolohiya ti kilusan isut gapuna a nagdesision nga agsubli iti sidong ti gobierno ken mangabarwanan.
Dinakamatna a naguyogoy daytoy nga agbalbaliw idi nangeganna ti whole of nation approach ti gobierno nga End Local Communist Armed Conflict.
Kabayatan ti acceptance ceremony, impaay ni Benguet PNP provincial director PCol. Reynaldo Pasiwen ti initial cash assistance iti surrenderee babaen iti Enhanced Comprehensive Local Integration Program (ECLIP).
Aw-awisen met ni Pasiwen dagiti nabatbati a kameng ti rebelde tapno sumukoda iti gobierno tapno nawaya manen nga agbiag dagitoy a natalna ken natalged kadwada dagiti pamilyada.
