BAGUIO CITY – Dumanonen iti 39,576 a pamilya iti Cordillera ti naapektaran iti magnitude 6.4 a gingined kas maibasar iti kaudian a datus ti Department of Social Welfare and Development (DSWD).
Manipud iti nasao a bilang dagiti naapektaran, 39,549 a pamilya ket manipud Abra bayat a 27 a pamilya sadiay Kalinga.
Iti interview ti Bombo Radyo, kinuna ni Enrique Gascon Jr., Assistant Regional Director for Administration iti DSWD-CAR, ti laeng Abra ken Kalinga ti naapektaran iti gingined.
Dinakamatna nga agtaltalinaed dagiti sangapulo ket tallo a pamilya kadagiti evacuation center, 176 a pamilya dagiti nakasubli kadagiti pagtaenganda ken nakipagnaed paylaeng kadagiti kakabagyanda.
Dumanon iti walo a balay ti entero a nadadael bayat a 1,934 dagiti partially damaged a balay.
Iti datus met ti Department of Health, tallo pulo ket dua nga indibidual ti nadangran gapu iti magnitude 6.4 a gingined.
Sigun met kenni Gascon, nakaipaay metten ti DSWD ti 236 a family food packs nga aggatad ti P160-K ken sangapulo a non-food items nga aggatad ti P10-K sadiay Lagayan, Abra.
Maibasar iti stockpile ti ahensiya, adda dagiti nakasagana a family food packs kadagiti nagduduma a warehouses iti Cordillera a maipaay kadagiti maapektaran a pamilya iti didigra.
Iti Abra – 9,536 family food packs; Apayao – 1,258; Kalinga – 5,229; Mt. Province – 1,090; La Trinidad Regional Warehouse – 9,572 ken Ifugao – 1,260.
