Ad-adda a ngimmato ti bilang dagiti Pilipino a makias-asawa kadagiti foreign national kas maibasar iti datus ti Commission on Overseas Filipinos (CFO).
Idi tawen 2022, pakabuklan a 6,854 a Pilipino ti nakiasawa kadagiti foreign national.
Nangatngato daytoy iti 40.1% nu idilig iti 4,891 a nailista idi tawen 2021.
Manipud iti 6,854 a bilang dagiti Pilipino a nakiasawa kadagiti foreigner idi tawen 2022, 2,808 kadagitoy ket naki-asawa kadagiti Amerikano, 555 dagiti naki-asawa kadagiti Australiano bayat a dagiti dadduma ket naki-asawa kadagiti Canadian, German, ken Japanese.
Kaadoan kadagiti naki-asawa kadagiti foreigner ket Pilipina ken kaadoan kadagitoy ket nagtaud idiay National Capital Region (NCR), Calabarzon (Region 4-A), Central Luzon, ken Central Visayas.
Maibasar pay iti datus ti Commission on Overseas Filipinos, naam-ammo dagiti Pilipino ti naasawada babaen iti personal a panangi-am-ammoda iti bagida.
Dagiti met dadduma ket naam-ammoda babaen iti trabaho, inyam-ammo ti kapamilyada ken naam-ammoda iti internet ken ads.
