BAGUIO CITY – Bassit latta ti bilang dagiti indibidual nga agturturong kadagiti kamposanto ti siudad ti Baguio kagiddan ti umadani a panakalagip ti Aldaw dagiti Minatay.
Maibasar iti datus, dumanon laeng iti 270 a grupo ti nagturong sadiay Baguio Public Cemetery agingga idi kalman ti pangaldaw.
Iti baet daytoy, adda latta dagiti nakumpiskar dagiti otoridad kadagiti maiparit a maitugot iti uneg ti kamposanto, partikular dagiti natatadem a kagawaan kas iti buneng.
Nainget pay a maiparparit ti panagawit ti arak, taraon, baraha ken panagtukar ti napigsa unay a musika.
Agtultuloy met ti panagwananawan dagiti pulis kadagiti parapubliko ken pribado a kamposanto iti siudad tapno maipanamnama ti panakaobserbar ti minimum public health standards kontra iti COVID-19.
Maipalagip a naiwaras ti 250 a pulis a mangimando iti linak ken kappia kadagiti kamposanto ditoy siudad kabayatan ti panakalagip ti Aldaw dagiti Minatay.
Kabayatana, naobserbaran met nga ado paylaeng kadagiti tanem ti saan pay a nadalusan ken napinturaan.
Maiparikep dagiti kamposanto inton Oktobre 30 agingga Nobyembre 3 ken mailukat manen inton Nobyembre 4 kas maibasar iti pagalagadan ti lokal a gobierno ti Baguio.
