BAGUIO CITY – Maragragsakan ti Baguio General Hospital and Medical Center (BGHMC) ken ti lokal a gobierno gapu ta maysa laengen ti COVID-19 patient nga agpapaimbag ditoy siudad.
![](https://img.bomboradyo.com/baguio/2020/05/96826220_558956071423186_7231438983190806528_n.jpg)
Daytoy ket kalpasan a naimbagan manipud iti nasao a virus ti 29 kadagiti pasiente.
Manipud iti 31 a kaso ti COVID-19 ditoy siudad, 29 ti nakarekober, maysa ti agpapaimbag ken maysa ti pimmusay.
Idi kalman, nakarekober ken nakaruar manipud BGHMC ni Karla Cosme Saja, 34 anyos ken nursing attendant iti Infectious Disease Building (IDB) ti BGHMC.
Inladawan ni Saja kas “bangungot” ken makapa-depress ti panagpositibo daytoy iti COVID 19.
Nupay kasta, kinunana a nagbalin daytoy a natured para iti pamiliana ken katrabahona isut gapuna a sinangona ti problema.
Kabayatanna, kinuna ni Dr. Ricardo Runez, Medical Center Chief ti BGHMC a maipaspasidongen iti home quarantine ti amin a healthcare workers a naimbagan manipud iti COVID 19 ditoy siudad bayat nga ur-urayenda ti sumaruno a swab test dagitoy sakbay nga ituloyda ti agtrabaho.
Iti agdama ket addan iti natalged a kasasaad ti nabatbati nga agpapaimbag a pasiente ti COVID-19 ditoy siudad.
Maysa daytoy a lalaki nga agtawen iti 41 nga addaan iti travel history sadiay Metro Manila.