Tiniliw ti National Bureau of Investigation ti 61-anyos a lalaki idiay Metro Manila a nagpampammarang kas medical professional iti uneg ti dua pulo a tawen.
Ti suspek ket maatap nga agresresita ti agas, agpaan-anak ken nangipatpatungpal pay ti dadduma a medical procedures nga awanan ti lisensiya.
Naduktalan ti iligal nga aramid ti suspek kalpasan a nagpulong iti National Bureau of Investigation ti maysa kadagiti empleyadona.
Inaklon met ti suspek a napaay daytoy a makapasa iti Medical Licensure Examination iti namin dua a daras.
Nupay kasta, sigun kenkuana ket intultuloyna latta ti panagbalinna kas doktor uray awanan daytoy ti lisensiya gapu ta kayatna a tumulong kadagiti agkasapulan.
Sigun pay iti suspek, nakalukat ti klinikna iti baente kwatro oras tapno mangipaay ti libre a konsultasyon.
Iti baet daytoy, sumango latta ti suspek ti nagtutuon a kaso pakairamanan ti estafa, illegal practice of medicine ken ti panaglabsing iti Philippine Pharmacy Act.
Iti agdama ket awan met ti statement dagiti otoridad seknan iti kasasaad dagiti nagbalin a pasyente ti suspek.
