BAGUIO CITY – Naituding nga idepensa manen ni Igorot mix martial artist ken Brave CF Bantamweight World Champion Stephen ‘The Sniper’ Loman ti titulona iti maikapat a gundaway iti main event ti BRAVE CF 30 a maangay sadiay Hyderabad, India inton November 23 (Sabado).
Depensaan ti Team Lakay fighter ti titulona kontra kenni Louie ‘Leonidas’ Sanoudakis ti Canada.
Maipalagip a manipud nagun-od ni Loman ti titulo kas kampeon iti bantamweight division ti nasao nga MMA promotion sadiay Middle East ket nabaelanna a naidepensa daytoy kontra kada Elias Boudegzdame, Felipe Efrain ken Frans Mlambo.
Nailistana met ti lima a nagsasaruno a panangabak manipud nagpirma ti kontrata iti Brave Combat Federation, pakairamanan ti debut bout-na iti BRAVE CF 1: Beginning.
Inabakna ni Gurdarshan Mangat a nagresulta iti panagbalinna kas kaubingan ken first-ever world champion iti bantamweight division ti Brave CF.
Agserbi met a biggest challenge ita kenni Loman ti panangidepensana iti titulona kontra kenni Sanoudakis a maysa kadagiti top bantamweight fighters ti Canada nga addaan ti dua a dominante a panangabak iti nasao nga MMA promotion.
Iggem ni Loman ti professional MMA record a 12 wins – 2 losses bayat nga iggem met ni Sanoudakis ti professional MMA record a 8 wins – 1 loss.
