Atok, Benguet- Manarimaan latta ti clearing operation dagiti nagduduma nga opisial ken volunteers iti napasamak a panagregaay ti daga idiay Sayangan, Atok, Benguet itay laeng parbangon, ita nga aldaw.
Gapu iti daytoy, kidkiddawen ni Atok Mayor Franklin Smith ti pannakaawat ti publiko nangruna dagiti matorista nga agdalan iti nasao a lugar.
Iti interview ti Bombo Radyo kenkuana, temporario paylaeng a “one lane passable” wenno maysa laeng ti mabalin a madalanan iti nasao a lugar.
Inyunay-unay ni Mayor Smith iti publiko a rumbeng nga agannad ken naalerto iti panagdalyasat iti nakapasamakan ti panagregaay gaputa “saturated” ti daga, ken posible pay gamin ti panagtinnag ti dadakkel a bato iti nasao a lugar.
Maibasar iti panagsukimat da Mayor Smith ken dagiti kakaduana nga opisial, awan ti balay a natamaan iti panagregaay ti daga ken impasiguradona nga agtultuloy ti panagbantayda bayat a maipatpatungpal ti clearing operation.
Kabayatanna, pinagyamanan met ni Mayor Smith dagiti nagduduma nga ahensia iti panangiwanawanda ti dalan tapno naannayas ti panagdalyasat dagiti motorista.
