BAGUIO CITY- Agtultuloy ti clearing operations dagiti soldado sadiay Barangay Mallig ken Sitio Tawini, Barangay Upper Atok, Flora, Apayao kalpasan ti nagsaruno nga engkwentro iti nagbaetan dagiti kameng ti 17th Infantry Battalion (17IB), Philippine Army ken dagiti kameng ti Communist Party of the Philippines-New People’s Army (CPP-NPA) idi kalman.
Iti interview ti Bombo Radyo Baguio kenn Maj. Jekyll Julian Dulawan, pannakangiwat ti 5th Infantry Division, Philippine Army, kinunana a kabayatan ti clearing operation ket nakumpiskar ti uppat nga M-16 rifles, sumagmamano a pampabettak, kagawaan para iti medikal, sumagmamano a subersibo a dokumento, bagpacks ken nagduduma a personal a kagawaan.
Immunan nga indeklara dagiti umili sadiay dagiti rebelde a grupo kas persona non grata kalpasan a nakapasarda iti panagkikkil ken pwersado a pannakaala dagiti taraon dagitoy a rason ti panakibinnadang iti kameng ti soldado.
Kidkiddawen ni Dulawan ti agtultuloy a panakimaymaysa ti publiko iti kampanya kontra kadagiti rebelde a grupo para iti in-inot ken naballigi a panakiroog dagitoy.
