BAGUIO CITY – Indeklara ti Commission on Elections (COMELEC) a ‘deemed not filed’ wenno maikonsidera a saan a nagipila iti kandidatura dagiti 25 a kandidato iti pagilian, pakairamanan ti tallo a kandidato ditoy rehiyon Cordillera.
Nabigbig iti six-page minute en banc resolution ti COMELEC en banc dagiti nasao a kandidato a pakairamanan da Baguio mayoralty candidate Atty. Edgar Avila, congressional candidate Adrian Libang ti Mt. Province ken aspiring councilor Jose Oryan ti Barlig, Mt. Province.
Nailanad iti resolusyon a ‘deemed not filed’ dagiti nasao a kandidato gapu iti saanda a panagtungpal iti inkalikagum ti komisyon a panagaramatda iti naamyendaran a porma ti Certificate of Candidacy (COC) nga addaan ti Item No. 22.
Iti panakiyuman ti Bombo Radyo Baguio kenni COMELEC – Cordillera Assistant Regional Director Atty. Vanessa Roncal, inlawlawagna a maikonsidera a ‘deemed not file’ wenno saan nga inawat ti komisyon ti kandidatura dagiti nasao a kandidato.
Dinakamatna a nagaramat dagiti tallo a kandidato iti daan a COC forms a saan nga inakseptar ti en banc ti COMELEC.
Innayonna a dapu iti daytoy ket saan to a mabilang ti botos dagiti nasao a kandidato iti masungad nga eleksion.
Naipaayan met dagiti maseknan a kandidato iti lima nga aldaw a pawayway tapnu agipila iti aniaman a legal nga addang tapnu marisut ti isyu.
