BAGUIO CITY – Naharang ti maysa a container van a naglaon ti frozen pork products manipud Angeles City, Pampanga babaen iti naipatungpal nga animal quarantine checkpoint sadiay Salpang, Taloy Sur, Marcos Highway, Tuba, Benguet idi Martes, October 1.
Sigun kenni PMaj James Acod, hepe ti Tuba PNP, ti nasao a lugan ket maysa a refrigerated van nga addaan ti plaka nga ABJ 9152 nga inmaneho ni Ian Bie Manzano, 34-anyos ken residente ti Angeles City, Pampanga.
Naglaon ti nasao a van iti 883 a kilo ti frozen pork jowls wenno pingping ti baboy ken 1, 980 kilo ti frozen chicken quarter legs nga addaan ti kompleto a travel documents.
Nupay kasta, adda ti impaulog ni Benguet Governor Melchor Diclas a memorandum a mangipawpawil iti temporaryo a panakaibiyahe dagiti baboy, fresh ken frozen pork ken dagiti pork products paturong iti probinsya gapu iti pangta ti African Swine Fever.
Inkustodiya ti Animal Quarantine Checkpoint sadiay Tuba, Benguet ti nasao a van ken dagiti linaon daytoy para iti validation nangruna ta nagtaud daytoy sadiay Angeles City, Pampanga nga addaan ti kaso nga African Swine Fever.
Kinuna ni Acod nga iniskortan dagiti pulis ti nasao a van manipud Tuba agingga sadiay Pugo, La Union ken dagiti pulis met ti Pugo ti nag-scort iti nasao a van pasubli iti nagtaudan daytoy a lugar. (with Bombo Brigitte Marcasi)
