BAGUIO CITY – Posible a marugian inton Abril wenno Mayo ti konstruksion ti Convergence Center and Indoor Sports Complex iti asideg ti swimming pool area ti Athletic Bowl.
Sigun ken ni City administrator Atty. Bonifacio dela Peña, naponduan ti proyekto iti P435 million a nagtaud iti pondo ti lokal a gobierno ita a tawen ken ti dadduma a pondo ket maala iti maipaay a pondo inton umay a tawen.
Mamati ni SK chairman ken councilor Levy Lloyd Orcales a babaen iti proyekto ket mapasayaat ti kontribusion dagiti agtutubo iti panagdur-as ti siudad.
Ibilbilang met ni City sports office head Gaudencio Gonzales kas dakkel a development ti pannakaipatungpal ti proyekto.
Kinunana a kangrunaan a maisagot ti proyekto kadagiti lokal nga atleta nga agkasapulan iti indoor sports facility.
Impanamnama ni dela Peña a mailukat iti publiko ti pasilidad apaman a malpas daytoy inton sumaruno a tawen.
