BAGUIO CITY – Saan paylaeng a siento porsiento a nakasagana ti Cordillera iti full-implementation ti face to face classes ita a bulan, sigun iti Alliance of Concerned Teachers (ACT).
Iti interview ti Bombo Radyo, kinuna ni ACT Cordillera Regional Coordinator Jeannette Cawiding, adda dagiti naapektaran a pagadalan iti rehiyon idi dinmayyeg ti magnitude 7 ken magnitude 6.4 a gingined ken dimmalapos ti bagyo.
Dinakamatna a kakaroan a naapektaran ti probinsiya ti Abra nga isu ti nagsentroan dagiti napigpigsa a gingined nu sadino nadadael ti lima pulo ket walo a pagadalan sadiay.
Innayon ni Cawiding a kurang dagiti classrooms ken mannursuro isut gapuna nga adda latta dagiti pagadalan iti Cordillera a mangipatungpal ti distance ken blending learning.
Impettengna met nga ipalubos daytoy ti Department of Education (DepEd) la ketdi adda ti maisumiter dagiti maseknan a pagadalan a pammalawag tapno mailaksidda paylaeng iti full implementation ti face to face classes.
Inaklon met ni Cawiding nga awan unay ti naadal dagiti estudyante kabayatan ti blending ken distance learning isut gapuna a kidkiddawenda iti gobyerno ti dakdakkel a pundo a mailatang iti Deparment of Education.
Babaen iti daytoy ket matarimaan a daras dagiti nadadael a pagadalan ken adda ti maala a kanayonan a mannursuro.
