Baguio City – Dinutukan ni Presidente Rodrigo Duterte ni MGen. Romeo Brawner Jr. kas baro a commanding general ti Philippine Army ti Armed Forces of the Philippines (AFP).
Ti 53-anyos a Cordilleran ket tubo ti Kiangan, Ifugao a dimmakkel ditoy Baguio City ken miembro ti Philippine Military Academy (PMA) MAKATAO Class of 1989.
Sinukatan ni Brawner ni LtGen. Andres Centino nga agdama a Chief of Staff ti AFP.
Epektibo ti panagtugaw ni Brawner iti baro a posisyonna idi kalman, December 7, 2021.
Nagduduma ken napapateg nga akem ti ingeman ni Brawner iti AFP pakairamanan ti Deputy Chief of Staff for Financial Management ti AFP, dadaulo ti 4th Infantry Division ti PA, Commandant of Cadets ti PMA ken kas Spokesperson/Deputy Commander ti Joint Task Force Ranao ti Marawi Siege idi 2017.
Nabigbig pay daytoy kas maysa kadagiti Most Outstanding Filipino Soldier idi 2013.
Kabayatanna, maysa metlaeng a Cordilleran a ni MGen. Henry Doyaoen ti second in command ti Philippine Army.
