Imbilin ti Court of Appeals idiay Dili, Timor-Leste ita nga aldaw ti “house arrest” kontra kenni sigud a Negros Oriental Representative Arnolfo “Arnie” Teves Jr. gaputa maibilang a “flight risk” daytoy.
Maibasar iti detalye nga impaay ti Timor-Leste media agency Hatutan, napaliiw ti korte a ni Teves Jr. ket sumangsango iti adu a kaso a pammapatay iti Pilipinas ken nagturong daytoy idiay Timor-Leste babaen ti pribado nga eroplano idi Abril 2023.
Naduktalan ti korte nga agnanaed daytoy iti maysa a balay nga addaan ti binnulan nga abang a $10,000 kaduana ti asawana ken dua nga annakna ken addaan iti nasurok a 20 nga empleado, 10 kadagitoy ket Filipino ken 10 kadagitoy ket Timorese.
Napaliiw pay korte a mangmangged daytoy kas kasosyo ti maysa a kompania nu sadinno, ipapaayanda daytoy ti pinansial a suporta.
Sigun iti nasao a korte, rumbeng a makemmeg ti nasao nga opisial bayat a maur-uray ti “extradition proceedings” daytoy.
Natakuatan pay ti Korte a balido ti pannakaibalud ni Teves ta naaramid daytoy kalpasan ti detention warrant nga inruar ti maysa a hues.
Iti agdama, awan pay ti komento ti kampo ni Teves Jr.
Maipalagip a ni Teves ket sumangsango ti kaso a “multiple charges” gapu iti panangpapatayna kenni Negros Oriental Governor Roel Degamo ken dadduma pay iti uneg ti pagtaengan daydi governor idi March 4, 2023.
