BAGUIO CITY – Limlimitaran ita dagiti ospital iti Baguio ti panag-awatda kadagiti pasyente dagitoy.
Iti interview ti Bombo Radyo Baguio, kinuna ni City Administrator
Engr. Bonifacio Dela Peña a gapu daytoy iti panakapunnon dagiti ospital iti siudad gapu iti agtultuloy a panagngato ti kaso ti COVID-19.
Kinunana a saanen nga agawat dagiti ospital ti Baguio kadagiti pasyente nga agtaud iti dadduma a rehion.
Innayonna a napagnumuan metlaeng daytoy iti taripnong ti One Hospital Command, ti healthcare referral network a mangikonkonektar kadagiti Pilipino nga agkasapulan ti medical attention kadagiti maseknan a service providers kas kadagiti ospital.
Linawlawagan met ni Engr. Dela Peña a tulongan latta ti Baguio dagiti pasyente nga agtaud iti LISTT Area a bukbuklen ti La Trinidad, Itogon, Sablan, Tuba ken Tublay.
Maibasar iti paka-ammo ti Baguio General Hospital and Medical Center (BGHMC), umad-ado dagiti severe cases ti COVID-19 nga ak-akomodaren daytoy ken sumagmamano kadagiti personnel ti pagagasan ti kasapulan a maipasidong iti quarantine ken isolation gapu iti panaka-expose dagitoy kadagiti COVID patients.
Dinakamat ti pagagasan a full occupancy dagiti COVID facilities daytoy, pakairamanan dagiti pasilidad para kadagiti probable cases ken suspect cases nga addaan ti comorbidities.
Napunno metten ti Emergency Room ti BGHMC kadagiti pasyente nga agur-uray kadagiti mabakantean a kama.
Gapu iti daytoy, saan pay nga agawat ti BGHMC kadagiti saan a naikoordinar a referrals.
Suspendido metlaeng ita ti face-to-face consultation ken minor procedures iti Out Patient Department (OPD) daytoy.
Nailanad a nainget nga implementarda ti teleconsultation services babaen iti official FB page ti BGHMC ken kasapulan a maki-appointment dagiti kayatda ti agpataming, nangruna dagiti non-urgent cases.
Temporaryo a nasuspindir ti hemodialysis services ita nga aldaw, September 7 ngem maituloy ti regular operations inton bigat, September 8, 2021.
Kinuna pay ti BGHMC a gapu iti umad-ado a kaso ti COVID-19 nga ak-akseptarenda ket limitarandan ti panag-awatda kadagiti emergency cases iti masakupan ti BLISTT Area.
Temporaryo pay a sinuspindir ti BGHMC ti panangakomodarda iti elective surgery tapnu maipaayan gundaway ti disinfection.
Kabayatanna, iti met paka-ammo iti publiko ti Notre Dame Hospital, kinunada a nadanundan ti maximum capacity kadagiti kwarto a nailatang para kadagiti COVID patients.
Gapu iti daytoy, temporaryo a saanda nga agakomodar iti kanayonan a probable ken confirmed patients ti COVID-19.
Kidkiddawenda metlaeng ti panagpataming dagiti pasyente nga agkasapulan ti dagus a panagtaripato mainaig iti COVID-19 kadagiti dadduma a healthcare facilities.
