BAGUIO CITY – Nanayonan ti pakabuklan a gatad ti dadael nga intunda ti El Niño wenno tikag kadagiti produkto iti sektor ti agrikultura ditoy rehiyon Cordillera.
Sigun kenni Department of Agriculture (DA) senior agriculturist Lito Mocati, nailista ti P1.2-B a danyos kadagiti agricultural products iti rehiyon.
Nupay kasta, linawlawaganna a maipasidong pay iti panagberipikar ti nasao a gatad nangruna ta insumitir metten dagiti probinsia ti Abra, Apayao ken Ifugao ti reportda kadagiti danyos iti agrikultura iti masakupan dagitoy.
Dinakamatna a kaaduan a dadael ket nailista kadagiti mula a high-value crops kas iti mais, pagay ken natnateng.
Maibasar iti rekord ti DA-Cordillera, nasurok P900-M ti dadael iti mula a mais, P380-M iti pagay ken nasurok P10-M iti highland vegetables.
Sigun pay kenni Mocati, manarimaan ti koordinasyonda iti Bureau of Soils and Water Management para iti aldaw ti panakaipatungpal ti cloud-seeding ditoy rehiyon Cordillera.
