Dumanon ti P4,500 ti mapatpatta a danyos ti nadadael iti nauram a pagtaengan sadiay Lot 4 Block 6 BPI Baguio Home Owners Association Cresencia Village, Baguio City idi kalman.
Maibasar iti inisyal nga imbestigasyon, napasamak ti uram gapu iti naliwayan nga ilutluto ti maysa a nataengan a bukel iti rooftop dagitoy.
Impeksa met dagiti kameng ti Bureau of Fire Protection a nagresponde iti nasao nga uram a narigatan dagitoy gapu ta nailet ti dalan ken adda paylaeng ti lugan a nakaparada iti igid ken adda metlaeng dagiti dangling wires iti entrance ti kalsada nga impangapangatoda paylaeng.
Dua met a water truck ti nagresponde iti daytoy.
Iti agdama, agtultuloy paylaeng ti kanayunan nga imbestigation iti napasamak nga uram.
Gapu iti dayta, nagpalagip manen ni Baguio City Mayor Benjamin Magalong iti publiko a siguraduen ken saan a liwayan dagiti lutlutuen tapno maliklikan ti uram.
Malaksid iti dayta, innayonna pay a kasapulan nga icheck dagiti electric wirings wenno kuryente iti balay nangruna nu pumanaw iti pagtaengan.//Bombo Noveh Organo
