BAGUIO CITY – Patien ti Department of Health (DOH) – Cordillera nga addan ti presensia wenno kaso ti Omicron variant iti nagduduma a probinsia ti Cordillera, saan laeng nga iti siudad ti Baguio.
Sigun kenni DOH-CAR Regional Epidemiology and Surveillance Unit Senior Health Program Officer Karen Lonogan, dakkel ti posibilidad a nakastreken ti Omicron variant iti rehion ngem saan laeng a mabigbig wenno makumpirmar gapu iti limitado a testing capacity ti Cordillera, partikular iti Whole Genome Sequencing.
Kinunana nga iti agdama ket maob-obserbaranen dagiti pagilasinan iti baro a variant ti COVID-19.
Dinakamatna a maibilang a maysa a contributory factor iti panagngato dagiti kaso ti COVID-19 iti rehion ti Omicron variant.
Kabayatanna, imbinglay ni Lonogan a kadawyan a makapkaptan ti COVID ita ditoy rehion ket dagiti 20-anyos agingga 40-anyos nga adda iti economic sector.
Innayonna a ngumatngato metlaeng ti bilang dagiti matmatay gapu iti COVID-19 kadagiti 60-anyos nga agpangato.
Gapu iti daytoy, inyunay-unayna a napateg ti panangipatungpal dagiti lokal a gobyerno iti polisiya tapnu maliklikan ti ad-adda a panagngato ti kaso ti COVID-19 iti rehion.
