BAGUIO CITY – Umap-apela ti Department of the Interior and Local Government Cordillera (DILG-CAR) kadagiti lokal a gobierno ditoy rehiyon a mangputarda iti ordinansa a mangipawil iti panaglako ti agas kadagiti small retail stores ditoy rehiyon tapno maliklikan ti itunda daytoy a peggad iti salun-at.
Sigun ken DILG-CAR Regional Director Araceli San Jose, masapol nga adda ti maputar a linteg a mangipawil iti pannakailako dagiti anyaman a klase ti pharmacist-only over-the-counter medicines kadagiti babassit nga stores.
Kinunana a mabalin a maibabawi ti business permit to operate a naipaay kadagiti stores iti kanito a maduktalan iti panangilakoda kadagiti pharmaceutical products nga awanan iti otorisasyon.
Inlawlawagna a mabalin nga agilako dagiti small variety stores iti agas ngem dagiti OVER-THE-COUNTER laeng saan a dagiti prescription drugs.
Guyguyuguyen pay ni San Jose dagiti lokal a gobierno iti pannaki-koordinarda kadagiti bukodda a city wenno municipal health offices, iti FDA ken component barangays tapno maipasigurado ti agtultuloy a supply iti authentic a produkto ken operasyon dagiti Botika ng Bayan ken Botika ng Barangay outlets iti masakupanda tapno saan a mataktak ti serbisyo.
Nagramot ti apela ni Dir. San Jose gapu iti pannaka-kemmeg ti maysa a negosyante nga agilaklako ken agsupsuplay iti peke nga agas kadagiti babassit nga stores sadiay Mankayan, Benguet.
Maipalagip a maibasar iti Section 30 iti Republic Act (RA) No. 10918, wenno ti Philippine Pharmacy Act, dagiti laeng FDA-licensed retail drug outlets wenno pharmacies ti rumbeng nga agilako iti drugs ken daddumapa pay a medisina para iti publiko.
