Guyguyugoyen ti Regional Alternative Child Care Office a maipasidong dagiti agpampanggep ken disidido nga agampon para iti usto a proseso daytoy.
Sigun kenni Felisa Singlan, Officer in Charge ti Regional Alternative Child Care Office-Cordillera, awan pay ti nailista a kaso dagiti aglaklako iti maladaga iti social media iti rehiyon Cordillera.
Nupay kasta, mabalballaagan dagiti nagannak wenno siasinuman nga agilako ken agilaklako kadagiti ubbing iti social media wenno online a mabalin dagitoy a sumango iti kaso a human trafficking, apaman a matakwatan dagitoy.
Malaksid iti dayta, kidkiddawen ti nasao a nga opisial ti tulong ti publiko nga ipakaammoda a dagus dagiti masarakanda a pages wenno online groups nga aglaklako iti ubbing ken maladaga tapno maipaayan daytoy iti dagus nga aksion.//Bombo Jez Lapizar
