Impakaammo ni Fire Senior Inspector Jeric Ramolete, Fire Marshall iti Bureau of Fire Protection-La Trinidad, Benguet, a nagsagrap iti fourth-degree burn gapu iti dakkel nga uram ti pimmusay a driver ti gas tanker iti napasamak nga aksidente idiay Puguis, La Trinidad, Benguet idi laeng kalman.
Iti pannakiuman ti Bombo Radyo kenkuana, kinunana a sibibiag paylaeng daytoy idi saan a simmabog ken limmiyab ti apoy ngem saan a nabaelan dagiti rescuers nga iruar agsipud ta naipit daytoy.
Dagus a nagkiddaw dagitoy iti tulong iti opisina ti La Trinidad fire station rason a nangipatulod met a dagus dagitoy iti extravagating device tapno marespondean ti nasao a driver.
Nupay kasta, bayat ti panagresponde dagitoy ket kellaat a limmiyab ti apoy isu’t gapuna a nagpaigid met dagiti rescuers ken awan ti naaramidanda tapno maispal ti nasao a biktima.
Gapu iti dayta, nangipatulod dagitoy a dagus iti tallo a fire truck tapno sebseban ti uram ngem saanda a nabaelan rason a nangideklarada iti second alarm no sadino timmulong met ditoy dagiti otoridad iti siudad ti Baguio, Tublay, Tuba ken Sablan.
Nagaramat metlaeng dagitoy iti Aqueous Film Forming Foam maysa a chemical tapno maapula a dagus ti uram.
Sigun kenkuana bimmayag iti uppat nga oras ti nasao nga uram sakbay a naideklara daytoy a fire out.
