Agpatpataming iti pagagasan ti driver ti maysa a truck bayat a nadischarge ti kaduana daytoy kalpasan a nadisgrasya dagitoy iti Andres-Cosalan Road idiay Sitio Boneng Barangay Poblacion, Bokod, Benguet.
Iti exclusive interview ti Bombo Radyo kenni Police Major Sergeant Hazlitt Biadno, manipud Bokod Municipal Police Station, kinunana a napasamak ti nasao nga aksidente gapu iti mechanical defect wenno loose break.
Sigun kenkuana, naggapu ti truck idiay Buguias, Benguet ken naglaon daytoy iti repolyo no sadino paturong daytoy idiay La Trinidad, Benguet idi napasamak ti aksidente.
Nabigbig dagiti biktima a da Romel Lagasi Dao-anes ti driver daytoy kaduana ti helperna a ni Simon Lao-an Pacatiw, agpada metlaeng a taga Tacadang, Kibungan, Benguet.
Dagus met a nagresponde dagiti otoridad sadiay rason a dagus a naitaray dagitoy iti Dennis Molintas District Hospital idiay Daklan, Bokod, Benguet ngem naiyalis metlaeng ni Dao-anes idiay Cordillera Hospital of the Divine Grace (CHDG) idiay Wangal, La Trinidad, Benguet para iti pannakataming.
Gapu iti daytoy, maiyunay-unay iti publiko partikular dagiti byaheros nga agannad tapno maliklikan ti aniaman nga insidente.
