BAGUIO CITY – Nakemmeg ti maysa a drug pusher iti buy-bust operation ng insayangkat dagiti otoridad ditoy siudad ti Baguio.
Nabigbig daytoy a ni James Chan Oliver aka James, 35-anyos, naasawaan, driver sadiay Tagudin, Ilocos Sur ken residente ti Arvisu Street, Middle Quezon Hill, Baguio City.
Nakumpiskar kenkuana ti dua a pakete ti maatap a shabu nga agdagsen iti agarup maysa a gramo.
Kabayatan ti panangkemmegda kenni Oliver ket kinapkapanda daytoy a nagresulta iti panakakumpiskar kenkuana ti maysa manen a pakete ti maatap a shabu nga agdagsen iti agarup lima a gramo.
Nakumpiskar pay kenkuana ti nagduduma a paraphernalia, ti cellphone ken motorsiklo nga inaramatna iti transaksion bayat a narekober kenkuana ti naaramat a drug bust money.
Naisayangkat ti operasyon babaen iti nagtipon a pwersa ti Drug Enforcement Unit, Station 7 ken Criminal Investigation Unit ti Baguio City Police Office kabinnadang ti PDEA – Cordillera.
Sumangsango ita ni Oliver iti kaso a panaglabsing iti RA 9165 wenno ti Comprehensive Dangerous Drugs Act of 2002.
