Naarestar dagiti tallo a Chinese National iti Fontana Resort idiay Clark, Pampanga no sadino dua kadagitoy ti maatap a kabagayna ni Huang Zhiyang, ti Chinese fugitive ken maatap a big boss ti Philippine Offshore Gaming Operator(POGO) hubs idiay Bamban, Tarlac, ken Porac, Pampanga .
Sigun kenni Philippine Anti-Organized Crime Commission (PAOCC) spokesperson Dr. Winston Casio, nangipaulog ti Bureau of Immigration iti mission order tapno masukimat ti Fontana resort isu’t gapuna nga inaramid dagitoy dagiti kabaelanda.
Kinuna ni Casio a nakaskasdaaw dagiti dokumento dagiti suspek isu’t gapuna a dagus nga inarestarda dagitoy.
Addaan dagitoy iti working visa, ngem ti korporasyon a pagtrabtrabahuan dagitoy ket bassit laeng a negosyo no sadino saanna a kaya a sustinaren ti visa dagitoy.
Maatap a ti maysa kadakuada ket kaanakan ni Huang Zhiyang bayat a ti maysa ket maatap a kasinsin wenno kabsat daytoy gaputa sumagmamano kadagiti kukua ni Huang Zhiyang ket nakanagan kenkuana.
Naarestar dagiti tallo gapu iti panaglabsingda iti immigration laws iti pagilian.
Kabayatanna, inlawlawag ti Fontana Development Corporation a sumagmamano kadagiti na-raid a villa ket nailako kadagiti agtagikua idi 2014 ken 2025.
Kinuna ti nasao a korporasyon a saan a nakanayon daytoy iti naganda ngem nakasagana ti nasao a kompanya a makitinnulong para iti imbestigasyon.//Rose
