BAGUIO CITY – Nakemmeg ti maikawalo a most wanted person ti Anda Municipal Police Station, Pangasinan kalpasan nga inserbi ti nagtipon a pwersa dagiti otoridad ti warrant of arrest daytoy iti bisinidad ti Bulanao Central School, Bulanao Norte, Tabuk City, Kalinga.
![](https://img.bomboradyo.com/baguio/2019/09/POLICE-REPORT-534x462-2.jpg)
Nabigbig daytoy a ni Valentino Cacho Clave, 50-anyos, naasawaan, karpintero, tubo ti Anda, Pangasinan ken agnanaed sadiay Babalag West, Rizal, Kalinga.
Nakemmeg ni Clave gapu iti kasona a frustrated murder babaen iti panagaramat ti saan a lisensiado a paltog.
Impaulog ni Presiding Judge Lilia EspanĚol ti Regional Trial Court Branch 55, First Judicial Region, Alaminos City, Pangasinan ti warrant of arrest ni Clave nga addaan ti piansa a P200,000.00.
Sigun iti pulisya, ni Clave ket baro a nabigbig a lider ti Clave Group a maatap a konektado iti gun running nga addaan operasyon iti 1st District ti Pangasinan.
Kabayatanna, nakemmeg metlaeng sadiay Purok 6, Bulanao, Tabuk City, Kalinga ti wanted person a nabigbig a ni Warren Bitanga Gongob, 31-anyos, naasawaan ken residente ti nasao a lugar.
Nakemmeg daytoy babaen iti bileg ti warrant of arrest nga impaulog ni Presiding Judge Jerson Angog ti Regional Trial Court, 2nd Judicial Region, Branch 25, Bulanao, Tabuk City gapu iti kasona nga acts of lasciviousness nga addaan piyansa a P120,000.
Naipasidong metten daytoy iti dokumentasyon sakbay a naipaima iti maseknan a korte.