BAGUIO CITY – Pimmusay ti dua nga indibidual kalpasan ti panagdinnungpar ti inmaneho dagitoy a motorsiklo iti kalsada sadiay Cada, Balili, Mankayan, Benguet, malem ti Dominggo, May 9, 2021.
Nabigbig dagitoy a da Jayson Abod Radion, 31-anyos, baro, mannalon, residente ti Balili, Mankayan, Benguet ken Sherwin Tip-ac, 21-anyos, baro, residente ti Paoay, Atok, Benguet.
Nadangran met iti insidente ti backrider a ni Joser Langpawen, 29-anyos, mannalon, residente ti Natonin, Mountain Province.
Maibasar iti report ti pulisya, maatap nga inagaw ti motorsiklo nga inmaneho ni Radion ti bangir a linya ti kalsada a nangitunda iti panakaidungparna iti kasabatna a motorsiklo nga inmaneho met ni Tip-ac.
Nagresulta daytoy iti panakatumba dagiti motorsiklo ken iti panagsagrap dagiti biktima iti dunor a rason tapnu maideklara dagitoy a dead on the spot.
Naitaray met iti pagagasan ni Langpawan nupay dagus daytoy a nakaruar metlaeng.
Malamlamayan metten ti bangkay dagiti dua iti bukodda a pagtaengan ken napagnumuan ti pamilya dagiti dua a dagitoyen ti mangisimpa iti kaso.
