Agpatpataming itan iti pagagasan dagiti dua pulo ket lima nga indibidual a nakairamanan dagiti dua pulo ket dua nga estudyante, tallo a mannursuro manipud Balbalan kalpasan a nabaliktad ti nagluganan dagitoy a jeep.
Iti pannakiuman ti Bombo Radyo kenni Police Lieutenant Colonel Medie Lapangan Jr., Public Information Officer sadiay Kalinga, kinunana a napasamak ti aksidente itay alas nuebe idi agsapa sadiay Sitio Saleng, Balantoy no sadino ti kaubingan kadagiti biktima ket agtawen iti sangapulo ket uppat.
Sigun kenkuana paturong dagiti biktima sadiay Tabuk City agsipud ta naituding a makipartisipar dagitoy iti drum and lyre competition inton Pebrero trese, para iti manarimaan a Kalinga Bodong Festival.
Nupay kasta, bayat a pababa ti nasao a lugan iti kalsada, naawanan daytoy iti preno a nangitunda iti pannakabaliktad ti lugan ken pannakadangran dagitoy.
Naiturong met a dagus dagitoy sadiay Western Kalinga District Hospital bayat a dagiti dadduma ket naiturong sadiay Kalinga Provincial Hospital para iti pannakataming dagitoy.
Kabayatanna, nagballaag met ni Lapangan Jr., kadagiti byaheros nga agalwad ken suruten ti BLOWBAGETS tapno maliklikan ti kapada nga aksidente.
