BAGUIO CITY – Pinirmaanen ni Mayor Benjamin Magalong ti Executive Order No. 75, series of 2020 a mangipalpalubos iti panaglukat dagiti hardware stores, office supply stores, electrical supply stores ken auto supply stores tunggal Huwebes ken Biyernes kabayatan ti Community Quarantine gapu iti COVID-19.
Maipalpalubos ti panaglukat dagiti nasao a supply stores iti alas-nuebe ti agsapa agingga iti alas-singko ti malem.
Nailanad iti pammilin nga agtultuloy ti panagaramid dagiti nagduduma a private sector volunteers ken donors iti protective equipment kas iti face shield, face masks ken dadduma pay a kasapulan para iti agdama a kampanya kontra iti COVID-19 ken iti panagbiahe dagiti lugan para iti panakaiwaras dagiti relief goods ken panakaitulod dagiti fronliners.
Napatgan ti limitado a panaglukat dagiti nasao a supply stores tapnu adda ti pagtaudan dagiti kasapulan a suplay iti panagaramid kadagiti nasao a protective equuipment para kadagiti health workers ken kadagiti frontliners ken iti panakamintinir ti lugan dagiti frontliners.
Nailanad pay iti pammilin a nasken a siguraduen dagiti nasao a supply stores ti nainget nga implementasyon ti hygiene ken sanitation protocols ken ti social distancing kadagiti kustomer dagitoy.
Naibilin pay a dagiti laeng essential ken skeletal employees ti agtrabaho kadagiti nasao a supply stores kabayatan ti panaglukat dagitoy.
