Nalaos ti ragsak a marikrikna dagiti performers, choreographers, parientes, ken personnel ti El Tribu D. Lucban ti Lucban Elementary School kalpasan a nangabak dagitoy iti kallepas a drum and lyre competition itay laeng agsapa iti siyudad ti Baguio.
Iti panakiuman ti Bombo Radyo ken da Marilou Tabernero, Lois Comila, ken Cherry Rimando manipud Lucban Integrated School, impeksa dagitoy ti bang-ar a nariknada kalpasan ti back-to-back championship ti El Tribu D. Lucban.
Kinunanada pay a nalaos ti ragsakda bayat a kinablaawanda dagiti amin a kaduada a nangibusbos iti oras, panawen, ken sakripisyo sakbay a naipatungpal ti performance dagiti ubbing.
Sigun kenni Lois Comila, “worth ti amin a sakripisyo, bannog, ken puyat nga naaramid dagitoy.”
Innayon met ni Marilou Tabernero a nopay adu dagiti saan a pagkikinaawatan dagitoy sakbay ti grand performance dagiti ubbing, saan met dayta a nakaapekto iti impabuyada.
Agyamyaman met dagitoy kadagiti amin a timmulong kangrunaan dagiti sponsors ken sigun kadakuada mangipatungpal pay dagitoy iti audit ken ag me-meetingda metlaeng para iti pannakaipatungpalan ti nangabakan dagitoy a P150, 000.
Mainaig iti dayta, impeksa met ni Teoderico Peralta Jr., Choreographer iti El Tribu D. Lucban ti Lucban Elementary School ti panagyamanna kadagiti nagannak dagiti performers iti effort ken tulong dagiti parientesda iti panang-aramidda kadagiti props dagiti performers.
Impeksana pay a nasurok lima a bulan ti binusbos dagitoy para iti panagsaganada iti Panagbenga 2025 a nagrugi idi Agosto ti napalabas a tawen.//Bombo Genzel Depayso
