Nadiskobre nga awanen iti biag ti maysa nga estudiante a babai nga agtawen laeng iti duapulo ket maysa iti unge iti boarding house daytoy idiay Barangay Betag, La Trinidad.
Daytoy ket babaen iti awan sarday a panangawag ti inana iti selpon.
Maibasar iti report iti La Trinidad Municipal Police Station,nasarakan nga awanan biag ti estudiante iti uneg ti kuartona. Saan a naidetalye iti report ti eksakto a petsa ti pannakadiskobre ngem naibaga a napasamak ti insidente idi napalabas nga aldaw.
Sigun iti pulisia, inulit-ulit nga inawagan ti inana ti anakna ngem saan a sumungsungbat. Gapu iti panagdanag, nagkiddaw daytoy iti tulong iti maysa a kabagianda tapno sarungkaran ken kitaen ti kasasaad ti balasang. Pagdanon iti boarding house, nasarakan dagiti kabagian ti biktima a naka-idda ken awanan iti puot iti uneg ti kwartona.
Dagos a naireport ti insidente iti pulisia a dagos met a nagkiddaw iti tulong iti Benguet Provincial Forensic Unit tapno maisayangkat ti nainget nga imbestigasion ken panangiproseso iti nakapasamakan ti insidente.
Iti agdama, agtultuloy paylaeng ti imbestigasion ken awan paylaeng ti nairuar a kanayunan a detalye manipod kadagiti otoridad. Saan metlaeng a nairuar ti pakabigbigan ti biktima kas panangraem iti napukawan a pamilia.
