Impakaamo ni Executive Secretary Lucas Bersamin a saan a makibiang ni President Ferdinand Marcos Jr. kadagiti naipila a kaso kontra kenni Vice Presidente Sara Duterte gaputa daytoy ti “prerogative” wenno prebelihio ti House of Representatives nga aramiden.
Idi laeng kalman, kinuna ni House Secretary General Reginald Velasco a saanna nga i-transmit ti tallo nga reklamo nga impeachment kontra kenni Duterte iti opisina ni House Speaker Martin Romualdez ita a lawas.
Sigun kenni Vice President Duterte, “welcome” kenkuana ti impeachment complaint a naipila kontra kenkuana.
Itay laeng nabiit, binabalaw ni ACT Teachers Rep. France Castro, Gabriela Women’s Party Rep. Arlene Brosas, ken Kabataan party-list Rep. Raoul Manuel ti “unprecedented delay” wenno pannakaitantan ti proseso ti naipila nga impeachment complaint.
Patien ti Makabayan bloc a nakaimpluwensia ti kinuna ni President Marcos a saan a panawen ti impeachment gaputa saan a makatulong daytoy kadagiti Pilipino.
Kas sungbat, inlawlawag ni Bersamin nga iyebkas laeng ni Marcos ti takderna ken saan a panaglapped iti House of Representatives.
