BAGUIO CITY – Epektibon ti face-to-face no contact visitation kadagiti persons deprived of liberty (PDL) iti Baguio City Jail Male Dorm.
Nupay kasta, inyunay-unay ni Jail Superintendent Mary Ann Tresmanio a dagiti laeng immediate family dagiti balud ti mapalubosan nga agbisita.
Inayonna a nasken a fully vaccinated dagiti agbisita no sadino iparangda pay ti vaccination card dagitoy ken masapul nga agsuotda ti facemask ken faceshield.
Dinakamatna a naikabil metten dagiti fabricated cubicles iti uneg ti pasilidad para iti face-to-face no contact visitation kadagiti balud.
Impettengna nga agtultuloy pay ti panagdur-as ti pasilidad babaen iti online platform tapno maipasigurado nga adda latta ti komunikasion dagiti balud kadagiti pamilya ken kabagyan dagitoy.
Sigun pay kenni Tresmanio, adda ti 37 a balud a nag-enroll iti sekondarya ken tallo met iti elementarya babaen iti Alternative Learning System a programa ti DepEd.
Impeksana ti panagyamanna iti maseknan nga ahensia ti gobierno ken iti lokal a gobierno ti Baguio City gapu iti agtultuloy a suporta dagitoy kadagiti programa, proyekto ken aktibidad a maipatpatungpal iti uneg ti pagbaludan.
