BAGUIO CITY- Umaw-awaten ti lokal a gobyerno ti Baguio City iti licence application para iti recreational fishing iti Burnham Park Lake.
Sigun kenni Supervising Administrative Officer Sandra Almag, mangrugi ita nga aldaw ket agawat ti City Environment and Parks Management Office (CEPMO) ti aplikasyon manipud kadagiti fishing enthusiasts ken hobbyists.
Inlawlawagna a nasken nga agala dagiti aplikante ti lisensia ken permit manipud iti CEPMO sakbay nga agbanniit dagitoy iti Burnham Lake.
Inyunay-unayna a saan a mabalin a maiyakar ti lisensia kadagiti daduma nga indibidual.
Inayonna a dagiti aplikante ket nasken a residente ti Baguio City ken addaan ti basic knowledge seknan iti panagbaniit tapno maliklikan ti aniaman nga insidente.
Ti nasao nga aktibidad ket adda iti sidong ti catch-and-release policy.
Nasken a kadwaen dagiti nagannak wenno guardian dagiti ubbing nga agtawen iti 17 nga agpababa.
Nasken metlaeng nga agimet dagitoy iti bukkodda a fishing gear kas ti fishing rod, bait ken bucket.
Limitado laeng iti sangapulo nga indibidual ti mapalubosan nga agbanniit iti fishing area tunggal aldaw ken dua nga oras laeng ti maximum iti tunggal indibidual
Para met kadagiti saan a residente ti Baguio City ken turista ket nasken nga agala pay dagitoy ti permit per fishing session.
Makanselar ken saan a maipaayan iti gundaway nga agbanniit dagiti aglabsing iti protocol kas ti iligal a panagaramat iti lisensia ken tampering.
