BAGUIO CITY – Mangipatungpal ti lokal a gobierno kadagiti addang tapno mapatawan iti pannusa dagiti indibidual a mangipapa-abang kadagiti puesto iti Baguio City Public Market.
Inbuktaktak ni Mayor Benjamin Magalong a naduktalan a dumanon iti ginas-gasut a ribo a pisos ti inaldaw a mapukpukaw iti siudad gapu iti iligal nga aktibidad iti merkado.
Kinunana a kas maibasar iti imbentario ket adda dagiti puesto nga agbaybayad iti P4,500 a binulan nga abang ngem maipapaabang dagitoy iti sabali a vendor iti P100,000 iti binulan.
Dinakamatna nga adda met laeng dagiti maab-abangan iti P300 iti binulan ngem maipapaabang dagitoy iti sabali iti P5,000 aginggat P10,500 iti binulan.
Kinuna pay ni Magalong a naduktalan nga adda pay dagiti nangilako iti karbenganda kadagiti puesto iti P200,000 aginggat P500,000.
Maibasar iti ordinansa ti siudad, mabalin a maikkat ti karbengan ti maysa nga stallholder no maduktalan nga inpaabang wenno inlakona ti karbenganna a maaddaan iti puesto iti merkado ken maipasidong iti public bidding ti mabakantean a puesto.
