“Saan yu ibagbaga a late kayu a nag start. Basta ipapati yu ladta… training kayu a training…Mayat ti jiu-jitsu saan unay a masapul a sobra nga ubing ka tapno sumabay kadagiti elite athletes.”
Godwin Amos Langbayan
Dayta ti impeksa ni Godwin Amos Langbayan, Jiu-jitsu World Champion ken miyembro ti Philippine National Sambo kabayatan ti panakiuman ti Bombo Radyo Baguio kenkuana.
Sigun kenni Langbayan, daytoy ket sinumrek iti Jiu-jitsu idi daytoy ket agtawen iti baente sais anyos.
Saan met unay a naladaw a tawen.
Iti panagbalin ni Langbayan kas maysa a Jiu-jitsu World Champion, ti katrabahona a Brazilian sadiay Japan ti nangguyoguy kenkuana a sumrek iti nasao nga sports gapu ta iti panagbalinna nga Overseas Filipino Worker ket saanna nga inlibak a timmaba daytoy.
Tawen 2015 idi nagturong daytoy sadiay Japan para iti panagtrabaho ken ditoy a sinerrekna ti Martial Arts.
Nu pay kasta, sigud nga ammona ti maipapan iti Martial Arts agsipud ta ti kabsatna a ni Gibran Langbayan ket isu ti kaunaan nga Igorot a Brazilian Jiu-jitsu Black Belt champion ken daytoy ket trainer iti agdama iti Lions Nation Mixed Martial Arts (MMA).
Iti panagsublina iti pagilian, intuloy ni Langbayan ti panag-ay-ayamna iti Jiu-jitsu ken ditoy a nabigbig isuna iti sangalubongan nu sadino nakaala daytoy iti nagduduma a pammadayaw a pakairamanan ti dua a gold medals kas World Champion.
Iti passion ken panag-ayayamna iti Jiu-jitsu, nakasagrap daytoy iti injury iti kaudian a labanna rason a ti naituding a laban daytoy ita a bulan ti Oktubre ket nakanselar para iti panag-imbagna.
Nakaskediul met ti sabali a labanna sadiay Kazakhstan inton Nobyembre iti agdama a tawen.
Kabayatanna, inyebkas ni Langbayan ti nalaos a panagyamanna kadagiti indibidual a nangtulong kenkuana iti panagbalinna kas Jiu-jitsu athlete gapu ta saan daytoy nga agbalin a World Champion nu awan ti suporta ken tulong dagitoy.
Inyunay-unay met ti atleta nga iti pananggun-od kadagiti arapaap ket nasken ti panag-anus ken dedikasyon.
