BAGUIO CITY – Pinaka-memorable a pangabak ita ni ONE Championship atomweight star Gina Iniong ti pananggun-odna iti balitok a medalya iti 55-kg female kicklight category ti kickboxing competition iti 2019 SEA Games.
Iti interview ti Bombo Radyo, naamuan a daytoy ti kaunaan a gundaway a lumaban ni Iniong iti kickboxing ken iti maysa nga amateur event kas iti SEA Games.
Indominana ti tallo a rikos a championship round iti nagbaetanda kenni Apichaya Mingkhwan ti Thailand iti iskor a 3-0.
Kinunana a pagyamyamananna met ti panagbalin a supportive ti asawana kalpasan a naitantan ti panag-honeymoon dagitoy tapnu maipaayan gundaway ti nainget a panagsanay ni Iniong para iti SEA Games.
Impalubos ti asawana ti panakipasetna iti SEA Games iti kondisyon a nasken a mapangabakanna ti balitok a medalya a maysa kadagiti nagbalin nga inspirasyonna tapnu ipangabakna dagiti labanna.
Kinuna ti 30-anyos nga Igorota mix martial artists a nagbalin a napintas ti bunga ti panagrigat, panakabannog ken panagsakripisyoda iti panagsanay ken panagsaganada.
Naamuan a maysa a lawas kalpasan ti kallaysa ni Iniong ket nagsubli daytoy iti panagsanay iti kickboxing para iti panakipasetna iti 2019 SEA Games.
Nakastrek daytoy iti Philippine National Kickboxing Team kalpasan a nakapasa kadagiti tryouts a pinasetanna idi naamuanna nga agkasapulan ti team iti addaan kapadasan a martial artist nga agbalin a panakabagi ti pagilian iti biennial games.
