BAGUIO CITY – Maituloy latta ti graduation ceremony ti Philippine Military Academy (PMA) Mandirigmang Isinilang na may Dangal at Lakas upang maging Tanglaw ng Inang Bayan (MASIDLAWIN) Class of 2020 iti baet ti krisis nga ituntunda ti COVID-19 pandemic.
Sigun kenni PMA spokesperson Captain Cheryl Tindog, awan pay ti pinal a bilang dagiti kadeteng a mangbukel iti PMA Class of 2020 gaputa manarimaan paylaeng ti final examinations dagitoy para iti serkenda a serbisyo iti Philippine Army, Philippine Navy ken Philippine Air Force.
Kinunana nga adda ti maaramid nga adjustments ken adu nga aspeto ti ikonkonsiderada nupay maituloy ti seremonya gaputa nalpas metten dagiti kadete dagiti requirements dagitoy.
Iinnayonna a makedngan laengen dagiti maipatungpal a protocol iti maisayangkat a seremonya gapu iti manarimaan nga enhanced community quarantine.
Iti agdama 211 ti bilang dagiti first class cadets ti PMA bayat nga immunan a naituding nga inton May 10 ti inisyal nga aldaw ti graduation ceremony ti PMA MASIDLAWIN Class of 2020.
Maipalagip a nairikep iti publiko ti akademya tapnu mailiklik dagiti kadete ken dagiti empleyado sadiay manipud iti COVID-19 ken nasuspindir dagiti crowd-drawing activities dagiti kadete iti ruar ti PMA bayat a nagbalin nga online ti klase dagitoy malaksid pay a nainget ti maipatpatungpal a social distancing kadagiti non-academic activities dagiti kadete.
Naamuan a ti kaunaan nga insidente a nakanselar ti graduation ceremony sadiay PMA ket idi panawen ti maikadua a gubat sangalubongan.
