BAGUIO CITY – Inrekomendar ken inadaptar ti municipyo ti Mankayan Benguet ti home care wenno home isolation kadagiti pasyente a makapaspasar ti mild cases.
Sigun ken Mayor Frenzel Ayong, praktikal a solusyon daytoy tapnu saan a mapunno dagiti ospital ken pasilidad sadiay ken saan a maburyong dagiti pasyente a nakapupok iti isolation facility.
Inlawlawagna nga apaman a maiturong amin dagiti COVID patient kadagiti ospital ken pasilidad ti municipyo ket dakdakkel ti pundo nga ipaluspos ti lokal a gobyerno kas iti napasamak idi napalabas a tawen.
Inayonna a saan a kabaelan ti lokal a gobyerno nga ipaay amin ti pagkasapulan dagiti pasyente a naipasidong ti isolation rason ti panangipalubosda iti home isolation.
Nupay kasta, impanamnamana a maiturong dagiti COVID patient a makapaspasar ti moderate ken severe cases iti ospital.
Imbinglayna pay nga iti agdama ket agtaltalinaed iti ospital kalpasan a naadmitar idi Abril 10 gapu iti pneumonia ken naamoan pay idi kalman a positibo daytoy iti COVID-19.
Gapu iti daytoy, palpalagipanna manen dagiti umili sadiay Mankayan, Benguet nga agtulnogda ken liklikanda paylaeng ti panag-attendar kadagiti social gathering partikular ti kasar ken lamay tapnu saan a makaptan dagitoy iti COVID-19.
